الزلابيه - لقمة القاضي
ريحة الزلابيه وهي طالعه من الزيت محدش يقدر يقاومها ، الكور اللي لونها ذهبي اللي بتتاكل لوحدها وبتدوب اللي بتكون غرقانه شربات عسل أو سكر بدره ، الزلابيه تعتبر جزء من الشارع المصري والعربي بشكل كبير تعتبر رفيق لسهرات وخروجات وفي ليالي الشتاء بالأخص - وللأسف نقطة ضعف لأي شخص بيعمل دايت .
طبعا في المقال ده هنتكلم أكتر عن الحلوى دي ونناقش أصل الحكايه وأصل الأكلة دي ايه وجت منين وايه سبب تسميتها بالأسم ده وطريقة لعمل الزلابيه عرفتها من صاحب محل حلويات هتعجبك أوي .
منين جات الزلابيه ؟
حلويات الزلابيه يرجع تاريخها لمئات السنين، واسمها تمك تغييره من بلد للتاني على حسب الثقافه والتقاليد، وطبعا كتير مننا مفكرين ان الزلابيه اختراع مصري خالص .
سر تسمية لقمه القاضي .
زمان، الزلابيه كانت بيتقال عليها " لقمه القاضي " لأنها كانت بتتعمل في كبار البيوت والمجالس . السر بقا وراء القصه دي هي ان كان في قاضي زمان القاضي ده كانت مكانته كبيره في الدوله وقتها، المهم ان لما كان حد بيزوره كان حابب يقدملهم حاجه خفيفه وسريعه خصوصا لما كان بيستقبل مسافرين ، كان بيأمر الطباخين في بيته بعمل أكلة سريعه وخفيفه مكونه من الدقيق والزيت والسكر، وهنا قرروا يعملوا حاجه تكون على شكل كور صغيره ويحطوها في الزيت ويكون لونها ذهبي وتخرج يرش عليها السكر وتكون سريعه الأكل وطعمها حلو .
وقتها القاضي احبها جدا وبقى مرتبط بيها في بيته وغير كده كان موجوده في بيته طوال الوقت لسبب حبه في الزلابيه ، ولما خرجت من بيته عن طريق توزيعها على العامه وكافة الشعب في المناسبات والأعياد ولما سألوا الطباخين عنها ووقتها عرفوا سر صنعه الزلابيه من الطهاه .
ووقتها عشان يميزوها عن باقي الحلويات أطلقوا عليها اسم لقمة القاضي عشان لما تروح أي مكان وتطلب لقمة القاضي يكون اسمها مميز ومعروفه بشكل أكبر عن باقي الحلويات كلها ، واللي بقت معروفه باسم دوناتس .
تاريخ الزلابيه - لقمة القاضي .
لقمة القاضي أو الزلابيه ليها أصول قديمه في المطبخ العربي، ، وفي تركيا بيسموها " لوكما " ، وفي اليونان بيسموها " لوكوماديس " . طبعا بسبب التجاره والسفر بين البلدان زمان حصل تبادل ثقافي في كل حاجه وكان من ضمن التبادل ده هو لقمة القاضي بين البلدان اللي لما كانت بيتم دخولها أي بلد عن طريق التجار بيتم اضافه لمسه خاصه بأهل البلد دي واللي بسببه بقت الزلابيه موجوده في كل بيت، وكل مكان بقا له لمسه خاصه بيه اللي بقت مميزه للمكان ده ، يعني في مصر الزلابيه بقت " بنت البلد" وبقت من أساسيات الحلويات اللي بنشوفها في كل مكان بيعمل الحلويات من أول العربيه القديمه اللي هتلاقيها في الأحياء الشعبيه ، لغاية أشهر وأفخر محلات الحلويات .
الزلابيه في العصر الحديث .
طبعا في وقتنا ده الزلابيه بقا ليها اضافات كتير وكل واحد بيحب الزلابيه بقا بيحط عليها " التاتش " أو اللمسه الخاصه بيه :
زلابيه بالشيكولاته : زي صوص النيوتيلا أو شيكولاته بيضاء وغيرها .
زلابيه الكراميل : بيقلب الزلابيه في صوص الكراميل .
زلابيه بالبستاشيو : وده الاختراع الجديد اللي بقا اضافه لأي حاجه .
زلابيه بالفاكهه: ان بيضيف قطع فاكهه لطبق الزلابيه مع صوص مانجو أو فراوله مثلا .
زلابيه العسل : ودي المعتاده والتقليديه اللي بيحط الزلابيه للعسل .
سر الصنعة: طريقة عمل الزلابيه .
أكبر مشكلة بتواجه أي حد بيعمل زلابية في البيت هي إنها تطلع طرية، أو تشرب زيت كتير، أو شكلها يطلع مش مظبوط. عشان تعملي زلابية زي الجاهزة بالظبط، لازم تركزي في الخطوات دي:
المكونات السحرية:
الدقيق: 2 كوب دقيق فاخر (يستحسن منخول).
الخميرة: ملعقة كبيرة خميرة فورية.
النشا: ده السر العظيم! (ملعقة كبيرة نشا هي اللي بتخليها مقرمشة).
السكر: ملعقة كبيرة سكر عشان الخميرة تتفاعل.
رشة ملح: عشان توازن الطعم.
المية: كوب ونص مية دافية (بالتدريج).
خطوات تحضير لقمة القاضي (خطوة بخطوة):
اختبار الخميرة: دوبي الخميرة والسكر في المية الدافية وسيبيها 5 دقايق لحد ما تعمل "فوم"، ده بيضمنلك إن الخميرة شغالة.
العجينة: اخلطي الدقيق مع النشا والملح، وانزلي عليهم بخليط الخميرة. اعجني كويس جداً، القوام لازم يكون مطاطي وناعم بس مش تقيل زي عجينة العيش، ولا خفيف زي الكريب.
التخمير: غطي العجينة وسيبيها في مكان دافي لمدة ساعة تقريباً لحد ما يتضاعف حجمها.
التشكيل (التحدي الكبير): استخدمي كيس حلواني أو ادهني إيدك بالزيت وقطعي العجينة بملعقة صغيرة مدهونة زيت برضو، ونزلي في زيت غزير وسخن.
القرمشة المزدوجة (سر المحترفين): عشان الزلابية تفضل مقرمشة وما تطراش، اقليها نص قلية (لونها يكون فاتح)، طلعيها تبرد، وبعدين ارجعي اقليها تاني في زيت سخن لحد ما تاخد اللون الذهبي الغامق. القلية التانية هي سر "القرمشة" اللي بنسمع صوتها!
خلي القلي في زيت نضيف (مش مستعمل قبل كدة) عشان نتجنب أي أضرار.
القيمة الغذائية للزلابيه ( لقمة القاضي ).
لازم نكون واقعيين، الزلابية حلوى غنية بالسعرات الحرارية لأنها مقلية وغرقانه في السكر والعسل . بس ده مش معناه إننا نحرم نفسنا، هي تعتبر "طاقة" سريعة للجسم.
سر شهرة الزلابيه ( لقمة القاضي )
السر في "البساطة". في عصر الحلويات المعقدة والجاتوهات اللي سعرها بيزيد كل يوم، بتفضل الزلابية هي "حلوى الغلابة والأكابر" في نفس الوقت. تكلفتها بسيطة جداً، مكوناتها موجودة في كل بيت، وبتقدر تلم العيلة حوالين طبق واحد سخن في جو شتوي بارد. "اللمة" اللي الزلابية بتخلقها، هي السبب الحقيقي اللي مخليها موجودة من أيام العثمانيين والمماليك لحد النهاردة، وهتفضل موجودة لأجيال جاية.
خاتمة
الزلابية مش بس أكلة، دي ذكرى. هي ريحة الشارع بالليل، هي فرحة الأطفال لما بيشوفوا "كورة العجين" وهي بتتحول لدهب في الزيت، وهي التحلية اللي بتصلح أي يوم وحش.
جربي تعمليها في البيت بالطريقة اللي قلناها، وماتنسيش رشة النشا هي اللي بتفرق، والقلية التانية هي اللي بتصنع المعجزات. وبالهنا والشفا!
هل عندك سر خاص في عمايل الزلابية؟ أو بتحبيها بصوص معين؟ شاركينا تجربتك في الكومنتات!
