فيروز - Fairouz

المقدمه :- 

صوت فيروز اللي عشنا معاه ومازلنا عايشين برنته، الصوت اللي تحس انه آله موسيقيه ومش مجرد صوت حد بيغني كده وخلاص بالعكس ده صوت قادر ياخدك ويبحر بيك لأجمل اللحظات، صوت له طابعه الخاص اللي صاحبه عرف ينفرد بيه ويتيميز فيه، صوت فيروز له احساس جميل .. احساس قادر انه يكون متواجد معاك في أي وقت وفي أي مكان .

فيروز صوتها فضل موجود مش زي مغنين الأيام دي بيظهروا سنه ويختفوا، لا، فيروز قعدت عقود طويله ولسه صوتها موجود في الوجدان ، حتى اللي مش عارف عن الغنا أكيد عارف فيروز وعارف صوت فيروز وعارف ومقدر كويس أوي مين فيروز، الناس في مصر ولبنان وسوريا وكل دوله عربيه حتى في اوروبا كامله عارفين كويس أوي مين فيروز ، عشان فيروز حكايه مش مجرد صوت.

بداية  فيروز :- 

اسم فيروز الحقيقي هو نهاد وديع حداد، اتولدت سنه 1935 في بيروت - في حي زقاق البلاط ، فيروز مكانتش من أسره غنيه بالعكس كانت من أسره متوسطه المعيشه مكانتش مشهوره لسه ولا حد يعرف مين فيروز ، بس فيروز من صغرها عندها صوت ملائكي ونادر الوجود لحظه اكتشاف فيروز وهي صغيره اكتشفوا بأن صوتها مش طبيعي ، لقوا ان غناء فيروز في صغرها بيشد الناس عشان تسمع مش عطف عليها لا خالص الناس كانت بتقف تسمعها عشان فعلا صوتها جميل جدا وبيشد .

فيروز انضمت للاذاعه اللبنانيه وهي عندها 12 سنه تخيل ! ، طفله بالعمر ده وبتغني على الهواء ، في الوقت ده فيروز قابلت الأخوين رحباني عاصي ومنصور ، بيقولك بقا ان عاصي الرحباني بالذات شاف في فيروز حاجه مكنتش موجوده في أي مطربه تانيه من حيث قدرات صوتها،حضورها القوي برغم انها كانت بتتكسف جدا، وعندها كيان كامل واحساس حاضر، وهنا بالمعني اللفظي تبناها فنيا وقررت يعمل من فيروز ظاهره فنيه مش طبيعيه وبالفعل قدر ينجح في ده بدليل اننا مازلنا بنستمتع بصوت واغاني فيروز.

الثالوث الأسطوري : فيروز والأخوين رحباني :- 

بيقولك بقا ان الأخوين رحباني موسيقين عباقره، عاصي الرحباني كان بيلحن وبيكتب، ومنصور شاركه في كده. قدروا انهم ياخدوا فيروز وطلعوا بيها لمستوى كبير جدا مستوى الاحتراف لفيروز عشان بعدها يبدأ عصر فيروز مع الأخوين رحباني .

فيروز مع رحباني مكنتش مجرد مطربه بتغني كلمات وخلاص، لا ، ده كان مشروع فني متكامل جدا من حيث المسرحيات الغنائيه ، بالفعل أيوة بالفعل عملوا معاها مسرحيات زي " جسر القمر" و " الليل والقنديل " " موسم العز " وغيرها طبعا وكلهم كانوا مسرحيات غنائيه واستعراضيه لفيروز ، ومازالت تاريخ وشاهد على بدايه فيروز في الغناء الاحترافي .

وقتها وبعد النجاح الكبير لفيروز مع الاخوين رحباني الناس بقت تنتظر المسرحيه زي ما بتنتظر مثلا الاجازة كده ، الناس بقت تعيش في حاله اسمها فيروز تفرح وتبكي وتتفرج وتدندن معاها وتهز براسها يمين وشمال من شدة جمال الصوت و الألحان واخراج الجمله و الوقفه والتنهيده حقيقي عمل فني مدروس جدا ، وهي بتغني زي " سألوني الناس " و " نسم علينا الهوا " و " سالتك حبيبي" طبعا في أكتر من كده في أغاني فيروز .

ايه اللي مميز في صوت فيروز :- 

صوت فيروز فيها حاجه مميزة صدقني مش هتلاقيها عند أي مغنيه سواء من الأجيال القديمه أو حتى اللي موجوده في وقتنا ده- صوتها صوت طفولي فيه طفوله غريبة تخليك تحس بان الست اللي بتغني قدامك على المسرح او بتسمع صوتها في الراديو دي تحس الصوت فيها طفله صغيره يعني حزن بس مش حزن فيه صوت جمال ناعم و دافي وحنين كده ، صوتها مش عالي قوي ومش واطي قوي صوت فيروز مش زي صوت أم كلثوم فيه عظمه وكبرياء، ولا زي صوت صباح اللي فيه قوة وهتافات ، ولا حتى ورده اللي فيه شجن ، صوت فعلا مميز جدا بكل حاجه وبكل شكل وصوت قادر يخطفك من عالم لعالم أجمل .

شجن فيروز من وحي صوتها لأن فيروز مكنتش بتزعق ولا بتصرخ صوت ساكن بس تأثيره عالي أوي على اللي بيسمعها سواء صغير أو كبير بدليل ان فيروز بيسمعها كبير وصغير حتى لو الصغير مش فاهم الكلمات اللي بتتقال ولكن هو مستمتع بالصوت اللي بيسمعه لأنه عارف صول الاحساس من غير ملل أو كتر كلام حتى - فيروز قادره توصل الألم من غير وجع والفرحه من غير أي هتاف .

علاقة فيروز بالصباح : - 

فيروز الصبح له طابع خاص، طبعا فنجان القهوة الصبح أو كوبايه الشاي أو الفطار مع صوت فيروز و أغنيه صبح الصباح فتح يا عليم والجيب مفهش ولا مليم ، ولا الحلوة دي قامت تعجن في البدريه والديك بيدن كوكو في البدريه ..يلا بينا على باب الله يا صنايعيه يجعل صباحك صبح الخير يا أسطى عطيه ، ولا نسم علينا الهوا، ولا كيفك انت ، ولا سألوني الناس ، ولا ولا ولا ... ، أغاني ليها طابع موسيقي خاص والحان فريده من نوعها ومقدمه موسيقيه لكل أغنيه مميزة اللي مازلت بتعيش جواها وبمجرد ما تسمع البدايه تحضر تحضر في دماغك الأغنيه بألحانها وكلماتها وتفضل تدندن فيها وانت بتسمعها أو حتى قبل ما تبدأ .

اللي أول مره سمع فيروز الصبح وهو بيشرب القهوه خصوصا في الشتاء ومع جو ممطر وغيمه مغطيه السماء ونسمه هواء ساقعه ، عرف يوصل بالجو اللي ممكن ميعرفش يبدء يومه من غير الحاله دي ما يعيش فيها حاله خاصه بيها مفيهاش أي احتياج غير الاستمتاع بفنجان قهوه وصوت الموسيقى اللي واللحن اللي بنتحرك فيه بترنح كده يمين وشمال .

ألقاب فيروز :- 

اختلفت ألقاب فيروز وكل لقب له سبب، ألقاب فيروز كانت ليها معاني كبيره أطلق عليها محبيها القاب زي :

قيثارة السماء : وده راجع لأنها صوت حنجرتها يرتفع لطبقات السماء وقدرتها على أداء الطبقات دي باحساس ملائكي .

جارة القمر : أطلق عليها اللقب ده نتيجه جمال ونوعمه صوتها العذب اللي قادر ياخد اللي بيسمعه للسماء ويروح بيه للقمر، وانها نجمه عاليه مشهورة وتسكن جنب القمر .

أرزه لبنان : دليل على الأصاله والعراقه ، والشموخ لشجرة الأرز المشهور بيها لبنان ، واللي موجوده على العلم اللبناني يعني رمز وطني وثقافي كبير .

أشهر أغاني فيروز :- 

عارف اغنيه سهر الليالي اللي مفيش فرح بقا ينفع من غيرها كده في النهايه اللي بقت طابع موجود في نهاية الفرح اللي بيتجمع فيها لمة الصحاب، اغاني فيروز الشهيره اللي قدرت تعيشنا في جو جميل حابين نعيش فيه ونفصل بيه .

و أغنيه كان عنا طاحونه اللي بنحس فيها بحلاوة الماضي وسذاجة الأيام الجميلة - وأغنيه " يا زهرة المدائن " أغنيه وطنيه فيها شجن وحزن مستخبي للقدس وللأراضي المحتله . 

والميز في  أغاني فيروز انها فيها نفس الحيوية والطاقة اللي عايشه من وقت نزول الأغنيه من السبعينات ولا الستينات لغايه وقتنا ده ، أغاني فيروز مش بتقدم وده راجع للذكاء في صناعه الأغنيه والاحساس للغنا ومش مجرد أغنيه سريعه وانتهت ،ده فن هادف ومحترم .

ومن أشهر أغاني فيروز زي " سالتك حبيبي ، سهر الليالي ، شايف البحر ، سألوني الناس ، كيفك انت ، نسم علينا الهوا ، اديش كان في ناس ، أنا وشادي ، تعا ولا تجي، بكتب اسمك يا حبيبي ، زعلي طول انا وياك "..." وطبعا غيرهم كتير .

علاقة فيروز بالبحر :- 

بص علاقة فيروز بالبحر كده عامله زي نفس علاقة السكر والعسل بالحلويات ، اللي من غير العسل أو السكر ده تبوظ الحلوى ومش هيعرف ويفهم الكلام ده غير اللي فعلا عارف أنا بتكلم و أقصد ايه بالظبط ، فيروز تسمعها على البحر سواء لحظه الصبح أو بليل كده مع صوت البحر وشكل القمر بليل وهي بتوقل شايف البحر شو كبير كبر البحر بحبك، ولا وهي بتقول زعلي طول انا واياك ولا راجعين يا هوا ، وغيرها وغيرها ، ... فيروز حالة مهما نتكلم عنها مش هنسكت .

استمرار فيروز من غير عاصي رحباني : - 

جواز فيروز من عاصي الرحباني كان قمه السعادة ليهم هما الاثنين ، فيروز جابت منه أبناء وهم زياد و ريما أو مريم و هلي و ليال، بس للأسف عاصي الرحباني اتوفي سنه 1986 ، وقتها وفاة عاصي الرحباني كان صدمه للعالم الفني، وأكتر حد اتأثر وتعب من الوفاة هي فيروز ولكن فيروز كانت ست قويه وصابره وفضلت تغني وتطلع حفلات وتبهر الناس وتمتعهم ، و زياد الرحباني ورث عن ابوه حب الفن والتلحين والكتابه وبقى موسيقار كبير وكمل المشوار .

فيروز قدمت حفلات على مسارح كتيره بمختلف العالم زي مسارح في لندن وموسكو وباريس ومسرح بعلبك، كل مره تقف على خشبه المسرح الناس تقطع ايدها من التسقيف ، وبرغم انها بتغني عربي معظم الناس الاجانب مكنوش فاهمين اللغه ولكن كانوا فاهمين الاحساس بالحزن والجمال بالصوت .

ليه فيروز بعيده عن الاعلام وتوقفت عن الغناء ؟ 

فيروز طول عمرها بعيده عن الشو الاعلامي وأضواء الكاميرات والاستوديوهات والضوضاء الاعلاميه، بعيده عن الظهور حتى بفيديو كليب أو حتى مشهد في فيلم أو حتى مؤتمر صحفي أو حتى مؤتمر فني ، ست قررت تنعزل بعيد عن الناس والضوضاء الاعلاميه والكاميرات وتعيش اللي باقي من عمرها جوه الصومعه اللي حبت تلاقي راحتها فيها خصوصا بعد حالتها في وفاة زوجها عاصي الرحباني، واللي زاد كمان بسبب حالات الفقد اللي اتعرضتلها في وفاة ابناءها ، ومازالت ريما بجوارها ترافقها حتى يومنا هذا وتساعدها في مختلف جوانب الحياه ومن حين لأخر تطل علينا ببعض اخبارها .

سر وجود واستمرار فيروز ! 

 فيروز مازالت عايشه جوه حبايبها وبتأثر في الناس، صوت حاضر في كل مناسبه في كل بيت وقاعة أفراح والصوت اللي بيتردد الصبح في الراديو ، وحتى في السهرات وفي قعدة ولمه الصحاب حتى لو بتسمع فيروز في الصحراء .

فيروز هتفضل عايشه جوانا بكل اغانيها والحانها وصوتها الرنان الدافي الهادي اللي محدش اختلف عليه ، الصوت اللي قادر يوصلك لأجمل شعور ويكون رفيقك في كل حالاتك واحساسك في شعورك بالحزن والحب والحزن والفقد - فيروز هتفضل مستمره جوانا .