أصوم أصوم وأفطر على بصله
مثل أصوم أصوم وأفطر على بصلة،أمثال مصرية شعبية،حكمة شعبية مصرية،تراث مصري،ثقافة مصرية،أقوال مأثورة مصرية،أمثال شعبيه،
أصوم أصوم وأفطر على بصله
السلام عليكم ورحمة الله وبركاته صباح الفل عليكم يومكم سعيد ان شاء الله
نخوووش في الموضوع علطول ..الموضوع النهارده عن مثل مصري مشهور جدا وبقينا نسمعه كتير وبقا منتشر في كل بيت وفي الشغل وفي القهوه وفي كل مكان ، طبعا احنا كمصريين مشهورين بخفه الدم وقد ايه من رحم المعاناه ممكن نقلبها ضحك وهزار ونكته ونديها احلى مثل شعبي يوصف الحاله، يمكن الموضوع بالنسبه لنا اللي هو انا عندي احساس كتيير كده وكلام اكتر ومش عارف اوصفه بس ممكن بمثال بسيط بكام كلمه يقول حاجات كتير جدا ويوضح حاجات اكتر.
بس برغم ان امثل الشعبي حاجه حلوة وموفره للكلام وبتوصف حاجات كتير، بس برضو في معظم الاوقات بنرمي بيه كلام ممكن يكون دبش للي قدامنا بس اللي هو انا بص جوايا منك حاجات كتير فهرمي مثل كده بشكل ايفيه يوصف الحاله اللي جوايا منك، اللي هو انا بوصلك رسال وياريت الانسان يفهمها مع زميل في الشغل بقا مع جوزك مع مراتك مع اخواتك.
طيب خلينا نتكلم عن الحدوته النهارده وحكاية المثل اللي معانا اللي هو ( أصوم أصوم وافطر على بصلة ) !، طبعا المثل بيعبر عن حاجات كتير أوي وممكن نستخدمه في كذا موقف ولكن مواقفه مميزة اللي هو ايه ده يعني اصوم واصبر كل ده وفي الاخر تبقا اخرتها بصلة ...بصلة ! .
خلينا نكون متفقين برضو ان مجرد حتة مثل من كام كلمه فيهم كم كوميدي على شوية حزن كده اللي هو المغلوب على أمره ، بيعبر عن التعب والالم والواقع اللي للاسف ممكن يكون بيتعب وكتير بنستغله في موقف كوميدي أكتر من كونه محزن .
أصوم أصوم وافطر على بصلة
أصل المثل: منين جت البصلة؟
زي معظم الأمثال الشعبية، مافيش حد يعرف بالضبط مين أول واحد قال "أصوم أصوم وأفطر على بصلة". لكن الروايات بتقول إن المثل ده نابع من واقع الحياة اليومية للفلاحين والبسطاء في الريف المصري.
الرواية الأولى: قصة اللي قرر يصوم وانخدع
في يوم من الأيام، كان في واحد فقير قرر يصوم تطوعًا، ونوى إنه بعد المغرب هايفطر على أكلة حلوة. طول اليوم وهو عامل حسابه إنه هاياكل فراخ أو لحمه أو على الأقل أكلة بسيطة بس تكون لذيذة ودسمه وهتسد معاه . جه وقت المغرب، فتح التلاجة أو زمان كان فيه حاجه شبه الصومعه بالطين كده بيخزن فيها الأكل ، لقى إنه مفيش حاجة ياكلها غير بصلة. هنا قال جملته الشهيرة: "أصوم أصوم وأفطر على بصلة".
الرواية الثانية: قصة الراجل الطموح
وفيه رواية تانية بتحكي عن واحد كان بيحلم بشيء كبير طول عمره. اشتغل، تعب، ادخر اللي هو بالبلدي حوش ، وخطّط، وفي الآخر النتيجة كانت أضعف بكتير من اللي كان متوقعه. فجابها على نفسه وقال: "أنا طول عمري بأصوم وأصوم، وآخرتها أفطر على بصلة!"
الروايتين مختلفين، ولكن المعنى واحد اللي هو تقعد تستنى وتصبر وتجتهد وفي الاخر حصاد محبط وضعيف .
معنى المثل: إيه اللي خلاه مشهور؟
"أصوم أصوم وأفطر على بصلة" مش مجرد كلمتين يتقالوا على بعض. ده تشبيه لحالة نفسية معقدة:
١. الإرهاق بعد المجهود
الصيام معناه الحرمان والتعب والجوع والعطش. تخيل إنسان يصوم طول اليوم، في الحر والشتا، ويمنع نفسه من كل حاجة، وكل ده عشان في الآخر ياكل بصلة؟ البصلة مش أكلة أساسية، هو طبعا الحمدلله على كل شئ ولكن الموضوع مرتبط بالاحباط - وان البصله مش أكلة شبع، ومش ممتعة زي الفراخ أو اللحمة. البصلة حاجة متواضعة جدًا. فالمثل بيوصف الإحباط اللي بيحصل لما تبذل مجهود كبير وتلاقي نتيجة متواضعة أو حتى مهينة.
٢. الفرق بين الحلم والواقع
كل واحد فينا عنده أحلام وأماني. بنشتغل عشانها، بنتعب عشانها، بنصبر وبنستحمل. لكن في كتير من الأحيان، بتضرب بوشك الحيطة، وتكتشف إن اللي وصلتله أقل بكتير من اللي كنت تحلم بيه. اهو المثل ده بيجسد اللحظة اللي بيصطدم فيها الحلم بالواقع.
٣. التهكم على النفس
يعني احنا كمصريين معروفين بحس الفكاهة العالي، حتى في أحزن المواقف. فبدل ما الواحد يفضّل زعلان ومكتئب، بيهزّ الموقف ويقولها بطريقة تهكمية ساخرة: "أصوم أصوم وأفطر على بصلة". كأنه بيقول لنفسه يالهوي يعني بعد كله ده يحصل ده طب ازاي !.
٤. الإحباط بعد الانتظار الطويل
الانتظار من أصعب الحاجات النفسية اللي ممكن تأذي أي حد . لما تستنى وتنتظر حاجة كتير، وتجهز نفسك لها، وتحلم باللحظة اللي هتحقق فيها حلمك، وبعدين يفاجئك الواقع بحاجة تانية خالص. ساعتها بتحس . باحباط كده وعايز تصرخ
إزاي بنستخدم المثل في حياتنا اليومية؟
المثل ده له استخدامات كتير في حياتنا اليومية. خلينا ناخد أمثلة :
في مثلا وانت صغير :
- هقولك مثلا فاكر زمان لما يقولولك طب روح هات الشبشب ولا البس جزمتك وهناخدك معانا فتروح بكل تلقائيه وسعادة غامره تجيب لمؤخذه الشبشب ، هوب ترجع متلاقيش حد أهو وقتها ينفع مثل البصله ده جدا .
في الشغل:
واحد شغال في شركة، بيتعب جدا ، بيجري ورا شغل زيادة و أوفر تايم ، بيضحي بوقته وصحته عشان يترقى. ييجي وقت الترقيات، يلاقي المدير رقّى واحد ممكن ميكنش له علاقه أصلا بالشغل أو قريبه مثلا، أو واحد مش قد المسؤولية. هوب هنا يقول : "أصوم أصوم وأفطر على بصلة"، ومشيها المثل بتاع البصله عشان وقتها ممكن يتقال حاجه تانيه بس هنعملها كت المره دي .
في الدراسة:
زي مثلا طالب ياعيني قاعد يذاكر ويتعب ويجتهد ومش بيخرج ومقضيها كورسات ودرورس وبيضحي بحياته الاجتماعيه وكل الرفاهيات في سبي انه يجيب مجموع كبير ويدخل الكليه اللي بيحلم بيها هوب يجي يوم النتيجه في المواجهه والصدمه يلاقي نفسه مجموعه زيه زي اللي مذاكرش ولا تعب وممكن كمان أقل منهم هوب ساعتها يحضر مثل أصوم أصوم وأفطر على بصلة .
في العلاقات:
واحد بيحب واحده ورايح جاي معاها ومصاريف وعزومات وخروجات وهدايا ومفاجأات ودلع عشان ينول الرضا ، وبيقدم كلها كل حاجه ، هوب في الاخر ياعيني يلاقي البنت تسيبه وتروح لابن عمتها اللي لسه راجع من الكويت وهنا تحضر اغنيه الفنان محمد فؤاد تجرح قلبي أنا تقسى عليا أنا خاينااااااه يا بسنت ، وهنا يحضر المثل بتعنا أصوم أصوم وأفطر على بصله ، اللي هو يعني أضحي وأصبر كل ده وفي الاخر مفيش !.
في الاقتصاد والغلاء:
وده أكتر استخدام بيحصل دلوقتي. الواحد بيشتغل طول الشهر، بيقسط على نفسه، يمسك كل قرش وأوقات يحرم نفسه كمان ، يحرق في دمه عشان يكوّن مبلغ أو يشتري حاجة. ييجي وقت الشراء، تلاقي الأسعار طارت، وكل اللي تقدر تشتريه بفلوسك هو بصلة واحدة! هنا الناس بتقولها من المعاناه : "أصوم أصوم وأفطر على بصلة".
تحليل نفسي للمثل: ليه بنحسه؟
دكتور نفسي ممكن يحلل المثل ده كالتالي:
الإحباط: وهو شعور طبيعي بيحصل لما النتيجة مش بتكافئ الجهد.
العدالة: الإنسان بطبيعته بيدور على العدالة. لما يبذل مجهود، عايز نتيجة. لما النتيجة مش عادلة، بيحس بالظلم.
اللاتناسق المعرفي: بين توقعاتنا (أكل حلو) والواقع (بصلة) بتحصل حالة من عدم التوافق النفسي، والمثل ده بيخفف من حدة الصدمة.
آلية الدفاع الفكاهية: الضحك على الذات والمشاكل إحدى آليات الدفاع اللي بنستخدمها عشان نحمي نفسنا من الانهيار.
لكن الدكتور هيقولك برضه: المثل ده رغم حزنه، إلا إنه في حتة تانية بيحفزك. ازاي؟ عشانه بيقولك: "متستناش كتير، عشان ماتزعلش كتير". بيعلمك إن الأوهام ممكن تدمرك، وإن الواقعية هي الحل.
طيب هما ليه اختاروا البصله في المثل ليه مش طماطم مثلا ليه البصلة بالذات؟
يعني مثلا ممكن بسبب ان البصله أو البصل عموما رخيص في السعر ومتاح لأي حد يشتريه من السوق ودي قمة الاحباط، وبرضو لأن البصله في حد ذاتها طعمها أوقات صعب والريحه قوية كذلك واحيانا بتوصل للدموع ودايما دموع دموع دموع
وفي معظم الروايات الأخرى - زمان - الناس الفقيرة كانت بتاكل البصله مع العيش والملح فا دي كانت اكلتهم الاساسيه فلما تقول المثل كأنك بتقول رجعت لأيام الفقر تاني .
إزاي نحمي نفسنا من الإحباط بتاع "أصوم أصوم وأفطر على بصلة"؟
بص عشان متتصدمش بالواقع بلاش سقف طموحك يعلي بيك اوي ولا تفتكر الشغل اللي انت فيه بعد سنه ولا كام شهر هيخليك مليونير فا كل حاجه عايزة صبر واجتهاد ، فا خلي توقعاتك واقعيه عشان متتصدمش .
حاول تنوع الخطط بتاعتك يعني الخطه أ منفعتش خلاص جرب خطه ب برضو منفعتش جرب خطه ج وهكذا لغايه لما حاجه تنفع .
طور مهاراتك واستمتع بالرحله والمعرفه والناس حتى لو كان الموضوع محبط احيانا وصعب ومش كويس ولكن استمتع برضو ، وان النتائج مش دايما في ايدينا والنتيجه مرتبطه بربنا ودي حاجه مفيهاش كلام .
بلاش تقنع نفسك انك خلاص فشلت لو وقعت مره أو مرتين قوم تاني وكمل واسعى .
استعين بالله وابدا من تاني ، عايز تعيط عيط وماله ، عايز تصيح صيح وماله مش عيب - الاحباط طبيعي بس اليأس مش كويس - ارجع اشتغل تاني وحط خطط من جديد ليه لأ .
وفي الاخر ؟
في الآخر، "أصوم أصوم وأفطر على بصلة" مش مجرد مثل، ده فلسفة حياة لناس كتير في مصر. بيعبر عن قدرة المصري على الصبر، وعن حسه الفكاهي، وعن إيمانه بالقدر. لكن الأهم، إنه بيعلمنا إن الحياة مش دايمًا عادلة، وإنه لازم نكون مستعدين للصدمات.
لكن ده مش معناه إننا نستسلم ونبطل نحلم. لأ، معناه إننا نحلم بس نحط رجل على الأرض. ونفضل نشتغل ونتعب، حتى لو النتيجة جت بصلة، على الأقل نكون عارفين إحنا فين.
ويمكن يوم من الأيام، نيجي نقول "أصوم أصوم وأفطر على ... فرخة". ساعتها هنضحك على المثل القديم ونفتكر قد إيه كنا بنعاني.
عيش يا باشا، وكل بصلة وانت مبسوط، يمكن بكرة تبقى فرخة.
